Guy de Maupassant

Guy de Maupassant ba 05/08/1850 koe Miromesnil lamone koe Tourville-sur-Arques koe Franca koblir. Inafa yasa tir xantafa gu Lorraina vox inkeyena koe Normandia mali XIII^-eafa decemda. Bak 1856, Hervé berikye koblir. Gadikya do toloy nazbeik ko Etretat bulur. Bak 1861/1862 Aubourg eceyik va tavera va solokseropa is ellasava is latinava is alka bam vajuler. Maupassant bak 1863 koe gertatavexo ke Yvetot toz vayar. Arti barda, vanpir ugdafimaf bemik nume pu gadikya zo dimdeswar. Kottaneavielon koe Croisset dositon gu Flaubert gilugalzer. Battel va in icde yona taneafa ezlaxa nyaper ise dun pirdar : disukera is dizvera is ligabera kan disuk abdi sutera. Guy de Maupassant gu geltrevafa serna zo tugrupenasar. Vani seotara va ekul bak 1869, den Paris kotla va int bender. Voxen bak 1870, batse gejadaktera kev Preussena tir. Maupassant wetce lizirasusik vilter aze va gwardera tcoker. Va inyona nakila koe konak warzot divrozatar.

Ba 01/02/1873 va elda va Birervolia rundanyar. Maupassant va kote stege is inyon milunekirik tabir. Bak 1875, ikayolton gu Joseph Prunier va « Nuba ke basalmanik » ( Une Main d'écorché ) taneaf reiz sanegar. Maupassant va jontik zolonik ke reugalafa suterotafa tamava nobar : va Turgenyev is Zola is Flaubert is Edmond de Goncourt is Mallarmé is jontikar. Juikenon gan Flaubert, va elda va Sanefa Tavera elda lajurundanyar. Bak 1877, suterot golde pregazakola mejer.

1880^-e tir ilanacek ke ziliyara va Maupassant. Va « Cwekfixuya » ( Boule de suif ) sanegar, va taneafa kiewatca. Laizafa awalkera ke Flaubert, bak mila tanda, vanolapar. Va int gu bata griawira me vinur. Maupassant bak 1881 gire toz kobar. Kiewatcapa ke « Tellier mona » ( La Maison Tellier ) bristur. Batvielu Maupassant va suteroteem blidar. Bak 1883, « Tanoya Blira » ( Une Vie ), taneaf berpot arti bunesa tevda adim awir. Bak 1884, « Reizak ke Dadjuga » ( Les Contes de la Bécasse ) tir lof grot. Ba 07/06/1885, Maupassant va « Nanye » ( Bel Ami ) sanegar, va berpot vektapas va sutesik. Akenafa tanda larde va bar-sanoy reiz loon sanegar.

Bak 1887 « Mont-Oriol » artfir. « Horla » askir da saneg va tacukafe tame. Maupassant va abdufira ke oviskuca dene koredik tere basdin gu intafa ilkuca luzdar. Sutesa rekola gu konaka koyara ko Lentefa Afrika goated. Bak 05/1889, Maupassant va « Pof dum Awalk » ( Fort Comme la Mort ) suteks sanegar. Kivara va tuguazawera is awalkera va inafa trakura loloon kereler. In ta koyara ko Italia ta vulkura va onkasa oviskewava va Franca bulur. Bak 1891 koe Divonne-les-Bains apkazur. Altofa vira tir omafa eke in pu kurmik welidar : « Konakviele va int en djuviltá. Me rodebelí, kota twa sutena va jin rotur… Lorik, maneke va blira tabí !» Arti tanda, koe Nice, va int laridagabé. Adre vanmecobanon belxar. Tire, va « Angelus » berpot al tozur. Grot zavzatar metenukeyen. Akolukera loloon tid nobafa numen va mawa leleon bulur. Kurmik va kobudera gorad aze ba 06/07/1893 koe ropexe kaiki konak aksatap ke yokara is sostawera in balem-san-bardaf di awalker.